XİDMƏTLƏRDƏN İSTİFADƏYƏ DAİR TƏLİMAT

Vaxtaşırı düzəliş edilə bilən və aviabazaar.az sistemindən istifadə şərtlərini ehtiva edən bu Xidmətlərdən İstifadəyə dair Təlimat (bundan sonra -Təlimat) “AVİABAZAAR” MMC ilə İstifadəçi arasında münasibətləri tənzimləyən sənəddir. Bundan sonra “AVİABAZAAR” MMC və İstifadəçi ayrı-ayrılıqda “Tərəf”, birlikdə “Tərəflər” adlandırılacaq.

İstifadəçi qeydiyyatı tamamlamadan öncə bu Təlimatı təsdiqləmək üçün “Xidmətlərdən istifadəyə dair təlimat ilə tanış oldum və qəbul edirəm” hissəsini işarələməklə Təlimatın tələblərinə riayət etməyi öz üzərinə götürür.

1. ƏSAS ANLAYIŞLAR

1.1 “Hesab” – İstifadəçinin aviabazaar.az platformasında qeydiyyatdan keçərək əldə etdiyi və Xidmətlərdən (bilet axtarışı, rezervasiya və alışı) istifadə hüququnu təmin edən şəxsi hesab.

1.2 “Sistem” – “AVİABAZAAR” MMC-yə məxsus olan, www.aviabazaar.az domenində yerləşən veb-platforma və/və ya mobil tətbiq.

1.3 “İstifadəçi” – “AVİABAZAAR” platformasında qeydiyyatdan keçərək xidmətlərdən (aviabiletlərin axtarışı, bronlaşdırılması, alınması və s.) istifadə edən fiziki şəxs.

1.4 “Şifrə” – İstifadəçinin sistemə giriş və özünü eyniləşdirmək üçün istifadə etdiyi məxfi simvollar (rəqəm və hərf kombinasiyası).

1.5 “Rezervasiya” – İstifadəçinin müəyyən uçuş üçün müvəqqəti yer saxlama əməliyyatı.

1.6 “Bilet” – Sistemdə yer alan hava yolları tərəfindən təklif edilən və istifadəçi tərəfindən əldə edilən uçuş sənədi (rəqəmsal və ya çap edilə bilən formada).

1.7 “Xidmət” – “AVİABAZAAR” MMC tərəfindən təqdim edilən aviabiletin onlayn axtarışı, seçimi, ödənişi, elektron biletin təqdim olunması və s. xidmətlər.

1.8 “Məxfilik Siyasəti” – AVİABAZAAR MMC tərəfindən hazırlanmış və istifadəçinin şəxsi məlumatlarının toplanması, saxlanması və işlənməsi qaydalarını müəyyən edən sənəd.

1.9 “Tərəf” – bu Təlimatda ayrı-ayrılıqda “AVİABAZAAR” MMC və ya “İstifadəçi”ni ifadə edir.

1.10 “Tərəflər” – bu Təlimatda “AVİABAZAAR” MMC və “İstifadəçi” birlikdə.

1.11 “Şirkət” – “AVİABAZAAR” MMC-ni ifadə edir.

2. TƏLİMATIN PREDMETİ

2.1 Bu Təlimat — İstifadəçinin AVİABAZAAR platformasında qeydiyyatdan keçməsi, şəxsi hesabının yaradılması, sistemdə təqdim olunan xidmətlərdən (aviabilet axtarışı, rezervasiyası, alınması və əlaqədar funksiyalar) istifadə etməsi zamanı “AVİABAZAAR” MMC ilə İstifadəçi arasında yaranan münasibətlərin hüquqi əsaslarını müəyyənləşdirir.

2.2 AVİABAZAAR MMC tərəfindən təqdim olunan əsas xidmətlər aşağıdakılardır:

2.2.1 Müxtəlif hava yollarının təklif etdiyi beynəlxalq və yerli reyslər üzrə aviabiletlərin axtarışı;

2.2.2 Seçilmiş uçuş üzrə birbaşa biletin alınması funksionallığı;

2.2.3 Uçuşla bağlı əlavə xidmətlərə yönləndirmə (baqaj seçimləri, oturacaq rezervasiyası, sığorta və s., əgər hava yolu və ya partnyorlar tərəfindən təqdim olunursa);

2.2.4 Alınmış biletlərin şəxsi kabinetdə idarə olunması (baxış, ləğv, dəyişikliklər və s.);

2.2.5 Elektron poçt vasitəsilə biletin təqdim olunması və məlumatlandırıcı bildirişlərin göndərilməsi;

2.2.6 Müştəri dəstəyi və texniki yardım xidmətləri.

2.3 AVİABAZAAR MMC təqdim olunan xidmətlərin siyahısını, funksiyalarını və onların istifadəsinə dair şərtləri birtərəfli qaydada dəyişmək (genişləndirmək və ya məhdudlaşdırmaq) hüququna malikdir. Hər hansı dəyişikliklər www.aviabazaar.az saytında dərc olunduğu andan etibarən qüvvəyə minir və istifadəçiyə tətbiq edilir.

2.4 Bu Təlimat çərçivəsində təqdim olunan xidmətlərdən istifadə zamanı tərəflər arasında yaranan münasibətlər yalnız bu Təlimat ilə deyil, eyni zamanda Azərbaycan Respublikasının müvafiq qanunvericiliyi, elektron kommersiya sahəsində qüvvədə olan qaydalar və “AVİABAZAAR” MMC tərəfindən dərc edilən digər hüquqi sənədlər ilə də tənzimlənir.

3. İSTİFADƏÇİNİN HÜQUQ VƏ VƏZİFƏLƏRİ

3.1 AVİABAZAAR platformasında təqdim edilən xidmətlərdən yararlanmaq istəyən fiziki şəxslər Azərbaycan Respublikasının qüvvədə olan qanunvericiliyinə və Şirkət tərəfindən müəyyən olunmuş minimum şərtlərə uyğun olaraq platforma vasitəsilə hesab açmalıdırlar. Təlimata uyğun olaraq qeydiyyat mərhələsini tamamlamış fiziki şəxslər İstifadəçi hesab olunur.

3.2 Şirkət tərəfindən İstifadəçiyə xidmətlərin göstərilməsi üçün təqdim olunan şəxsi və əlaqə məlumatları birbaşa İstifadəçi tərəfindən doldurulmalı və sistemə daxil edilməlidir. Təlimat etibarnamə əsasında təsdiqlənə bilməz. İstifadəçi yalnız ona məxsus və düzgün məlumatları sistemə təqdim etməlidir. Şirkət təqdim edilən məlumat və sənədlərin düzgünlüyünü təsdiqlədikdən sonra xidmətlərin göstərilməsinə başlaya bilər. Qanunvericiliklə müəyyən edilmiş hallarda GMA (Gücləndirilmiş Müştəri Autentifikasiyası) tətbiq oluna bilər.

3.3 İstifadəçi qeydiyyat zamanı təqdim etdiyi şəxsiyyət və əlaqə məlumatlarının düzgünlüyünə tam məsuliyyət daşıyır. Daxili nəzarət və uyğunluq yoxlamaları zamanı uyğunsuzluq və ya üçüncü şəxslərin məlumatlarının təqdim edilməsi ilə bağlı şübhə yarandıqda, İstifadəçi bu məlumatların düzgünlüyünü təsdiqləmək üçün əlavə sənədlər təqdim etməyə borcludur.

3.4 İstifadəçi platformadakı xidmətlərdən istifadə edərkən yalnız öz adından hərəkət etdiyini və üçüncü şəxslərin adından istifadə etmədiyini qəbul edir. Şəxsi şifrə və giriş məlumatlarını üçüncü şəxslərlə paylaşmaq və ya onların istifadəsinə şərait yaratmaq qəti qadağandır.

3.5 İstifadəçi AVİABAZAAR vasitəsilə təqdim olunan xidmətlərdən yalnız qanuni məqsədlər üçün istifadə edəcəyini və platformanı heç bir halda cinayət yolu ilə əldə edilmiş vəsaitlərin leqallaşdırılması, terrorçuluğun maliyyələşdirilməsi və digər qeyri-qanuni fəaliyyətlər üçün istifadə etməyəcəyini bəyan edir. 

3.6 İstifadəçi, Şirkətin 4.2-ci bənddə qeyd edilən məsuliyyət istisnalarını nəzərə alaraq, üçüncü şəxslərin əməliyyatlarından irəli gələn mübahisələrdə Şirkətin məsuliyyət daşımadığını qəbul edir və bu halda Şirkətə qarşı heç bir iddia irəli sür bilməz.

3.7 İstifadəçi özünə məxsus ödəniş vasitələrinin (kart, hesab, şifrə və s.) itirilməsi, oğurlanması və ya səlahiyyətsiz istifadə hallarında dərhal Şirkəti məlumatlandırmalıdır.

3.8 İstifadəçi yalnız xidmətlərin təqdim olunması üçün nəzərdə tutulan şərtlərə əməl etməklə və xidmət haqlarını (əgər tətbiq olunursa) ödəməklə Şirkət tərəfindən təklif olunan xidmətlərdən istifadə edə bilər.

3.9 İstifadəçi istənilən vaxt AVİABAZAAR platforması vasitəsilə bu Təlimat ilə tanış olmaq hüququna malikdir.

3.10 İstifadəçi Şirkətin yazılı icazəsi olmadan AVİABAZAAR ticarət nişanını və digər əqli və sənaye mülkiyyəti obyektlərini kopyalaya, təqlid edə və ya istifadə edə bilməz.

3.11 Şirkət məsafədən autentifikasiya məqsədilə İstifadəçiyə fərdi təhlükəsizlik məlumatları təqdim edir. İstifadəçi bu məlumatları qorumağa və üçüncü şəxslərlə paylaşmamağa borcludur.

3.12 İstifadəçi qüvvədə olan qanunvericilik və bu Təlimatda əks olunan müddəalara uyğun olaraq hüquqlara malikdir və müvafiq vəzifələri daşıyır.

4. ŞİRKƏTİN HÜQUQ VƏ VƏZİFƏLƏRİ

4.1 Şirkət bu Təlimatın 2.2-ci bəndində göstərilən xidmətlərin, o cümlədən istifadəçilər üçün müxtəlif ödəniş imkanları vasitəsilə aviabiletlərin onlayn satışı və digər turizm xidmətlərinin təqdim edilməsini təmin edir. AVİABAZAAR tərəfindən təqdim olunan xidmətlər üzrə məhdudiyyət və limitlər qüvvədə olan qanunvericilik və Şirkətin daxili qaydaları ilə müəyyən oluna bilər. Şirkət, xidmətlərini dəyişdirmək, təkmilləşdirmək və ya istənilən vaxt tam və ya qismən ləğv etmək hüququnu özündə saxlayır.

4.2 Şirkətin məsuliyyəti aviabiletlərin təqdimatı, satışı və digrə turizm xidmətləri ilə bağlı olan texniki və inzibati funksiyalarla məhdudlaşır. İstifadəçi platforma üzərindən üçüncü tərəf hava yolları şirkətlərindən aldığı biletə görə təqdim olunan xidmətin (uçuşun) keyfiyyətinə və ya icrasına dair yaranan hər hansı mübahisə və ya problemə görə AVİABAZAAR məsuliyyət daşımır.

4.3 Şirkət qanunvericilik və daxili nəzarət prosedurlarına uyğun olaraq aşağıdakı hallarda istifadəçi əməliyyatlarına nəzarət, monitorinq və audit həyata keçirə bilər:

4.3.1 Qeydiyyat zamanı təqdim olunan məlumatların düzgünlüyünün yoxlanılması məqsədilə;

4.3.2 İstifadəçinin başqasının adından hərəkət etməsi ehtimalını müəyyən etmək məqsədilə;

4.3.3 İstifadəçinin giriş və autentifikasiya məlumatlarını üçüncü tərəflərlə paylaşması halının araşdırılması üçün;

4.3.4 Şirkətin xidmətlərindən qeyri-qanuni məqsədlərlə istifadə olunub-olunmamasının yoxlanılması üçün;

4.3.5 Sistemdə həyata keçirilən əməliyyatların saxta və ya icazəsiz olması ehtimalını araşdırmaq üçün;

4.3.6 İstifadəçinin hesabına və ya ödəniş əməliyyatlarına saxta və ya icazəsiz müdaxilə cəhdlərini müəyyən etmək üçün.

4.4 Şirkət aşağıdakı hallarda, qanunvericiliklə nəzərdə tutulmuş məhdudiyyətlər çərçivəsində, hər hansı bir xəbərdarlıq etmədən aşağıdakı tədbirləri həyata keçirmək hüququna malikdir:

4.4.1 Xidmətlərin tam və ya qismən dayandırılması;

4.4.2 İstifadəçiyə təqdim olunan xidmətlərin dondurulması, məhdudlaşdırılması və ya ləğvi

4.5 Şirkət, bu Təlimatın 4.4-cü bəndi çərçivəsində həyata keçirilən əməliyyatlar barədə istifadəçiyə əməliyyat baş verməzdən əvvəl, bu mümkün olmadıqda isə əməliyyatdan dərhal sonra məlumat verir.

4.6 İstifadəçi tərəfindən bildirildikdən sonra, avtorizə edilməmiş ödəniş əməliyyatı ilə bağlı sübutlar Şirkət tərəfindən qanunvericiliklə müəyyən olunan müddət ərzində təqdim olunmazsa, Şirkət əməliyyat məbləğini və onunla bağlı tutulmuş xidmət haqlarını növbəti iş gününə qədər istifadəçiyə geri ödəməlidir.

4.7 Şirkət öz mülahizəsinə əsasən istifadəçinin autentifikasiyası məqsədilə, qeydiyyat zamanı və ya sonradan istənilən vaxt əlavə yoxlama prosedurlarını həyata keçirə bilər.

4.8 Şirkət, istənilən vaxt əvvəlcədən xəbərdarlıq etmədən xidməti (tam və ya qismən) dayandıra, ləğv edə və ya istifadəçinin xidmətlərə çıxışını məhdudlaşdıra bilər. Bu zaman istifadəçiyə dəyə biləcək hər hansı itki və ya narahatlıq üçün Şirkət məsuliyyət daşımır. 

4.9 Şirkət, qüvvədə olan qanunvericilik və bu Təlimat ilə müəyyən edilmiş digər öhdəlik və hüquqlara malikdir.

5. “AVİABAZAAR” PLATFORMASINDA QEYDİYYAT VƏ İSTİFADƏÇİ HESABININ YARADILMASI

5.1 AVİABAZAAR platforması vasitəsilə təqdim edilən xidmətlərdən istifadə etmək üçün İstifadəçi sistemdə qeydiyyatdan keçməli və şəxsi istifadəçi hesabı yaratmalıdır. Şirkət, əsas göstərmədən istənilən şəxsi sistemdə qeydiyyata almaqdan imtina etmək hüququna malikdir. Bu imtinaya dair əsaslandırma təqdim etmək Şirkətin öhdəliyi deyil.

5.2 AVİABAZAAR sistemində istifadəçi hesabı açmaq istəyən şəxs, mövcud qanunvericiliyin tələblərinə uyğun olaraq rezidentlik statusunun müəyyən edilməsi və şəxsiyyətin identifikasiyası məqsədilə uyğun prosedurlardan keçməlidir.

5.3 Qeydiyyat zamanı istifadəçi olmaq istəyən şəxs özünə şəxsi hesab yaradır. Bu hesab yalnız həmin istifadəçiyə məxsusdur və başqa şəxs tərəfindən istifadə edilə bilməz. İstifadəçinin sistemdə yalnız bir aktiv hesabı ola bilər.

5.4 İstifadəçi “Xidmətlərdən İstifadəyə dair Təlimat ilə tanış oldum və qəbul edirəm” hissəsini işarələməklə və qeydiyyat prosesini başa vurmaqla, bu Təlimatın bütün şərtləri ilə tanış olduğunu, onlarla razılaşdığını və həmin şərtlərə riayət edəcəyini təsdiq edir. 

5.5 İstifadəçi təsdiq edir ki, qeydiyyat zamanı təqdim etdiyi məlumatlar doğrudur və gələcəkdə məlumatlarda hər hansı dəyişiklik baş verdiyi halda, bu barədə dərhal sistemə yenilənmiş məlumatları təqdim edəcək. Yanlış, natamam və ya saxta məlumatların təqdim olunmasından doğan nəticələrə və mümkün zərərlərə görə istifadəçi tam məsuliyyət daşıyır.

5.6 AVİABAZAAR sistemində qeydiyyatdan keçmək və platforma üzərindən təqdim olunan xidmətlərdən (aviabiletin alınması, ödənişin aparılması, sifarişin izlənməsi və s.) istifadə etmək üçün istifadəçi identifikasiyadan keçməlidir. Qanunvericilik və Şirkətin daxili siyasəti çərçivəsində müəyyən hallarda əlavə avtorizasiya, təhlükəsizlik yoxlamaları və autentifikasiya (məsələn: GMA - gücləndirilmiş müştəri autentifikasiyası) tələb oluna bilər. Bu tədbirlər həm Şirkət, həm də istifadəçi üçün təhlükəsizliyin təmin olunması məqsədilə həyata keçirilir.

6. İSTİFADƏÇİ HESABINDAN İSTİFADƏ QAYDALARI

6.1 İstifadəçi, AVİABAZAAR sisteminə daxil olmaq və ondan istifadə etmək üçün qeydiyyat zamanı təqdim etdiyi email ünvanı və ya mobil nömrəsi və şifrə vasitəsilə daxil ola bilər. Eyni zamanda, təhlükəsizliyi təmin etmək məqsədilə istifadəçiyə SMS vasitəsilə birdəfəlik təhlükəsizlik kodu göndərilə bilər. Bu kod aşağıdakı hallarda tələb olunur:

6.1.1 İstifadəçi hesab şifrəsini mobil nömrə ilə dəyişdirdikdə;

6.1.2 İstifadəçi hesabında qeyd olunan telefon nömrəsini dəyişdirdikdə;

6.1.3 Qanunvericiliklə müəyyən edilmiş hallar və ya Şirkətin təhlükəsizlik siyasətinə əsasən qərar verdiyi digər hallarda.

6.2 SMS ilə təqdim olunan birdəfəlik təhlükəsizlik kodunun düzgün və yalnız təyinatı üzrə istifadə olunmasına, bu məlumatın üçüncü şəxslərə ötürülməməsinə görə məsuliyyət birbaşa istifadəçiyə aiddir. İstifadəçi bu kodun təhlükəsiz saxlanılmasını təmin etməli və istənilən sui-istifadə halının qarşısını almalıdır.

6.3 Qanunvericiliyin imkan verdiyi hallar istisna olmaqla, AVİABAZAAR platformasında valyuta mübadiləsi funksiyası mövcud deyil. Ölkədaxili ödəniş əməliyyatlarında valyuta çevrilməsinə yol verilmir.

7. XİDMƏT HAQQI VƏ VALYUTA MÜBADİLƏSİ MÜBADİLƏSİ

7.1 Bu Təlimatda nəzərdə tutulan qaydada xidmət haqqı tutulduqda və ya valyuta mübadiləsi tətbiq edildikdə həmin xidmət haqqı və ya valyuta məzənnəsi barədə İstifadəçiyə ödəniş sərəncamından öncə aviabazaar.az vasitəsilə məlumat təqdim edilir. İstifadəçi sərəncamı təsdiq etməklə həmin xidmət haqları və ya valyuta məzənnəsinə razılığını bildirmiş olur.

8. ƏLAQƏ VASİTƏLƏRİ

8.1 Tərəflər arasında kommunikasiya aviabazaar.az platforması, telefon zəngi, Şirkətin istifadə etdiyi tətbiqlər və elektron poçt vasitəsilə aparıla bilər.

8.2 Şirkətin əlaqə məlumatları yuxarıda “Şirkət barədə məlumatlar” hissəsində göstərilir. Əlaqə məlumatları dəyişdikdə, İstifadəçiyə bu barədə aviabazaar.az platformas vasitəsilə məlumat verilir.

8.3 İstifadəçinin əlaqə məlumatları onun aviabazaar.az sistemi vasitəsilə Şirkətə təqdim etdiyi məlumatlardır. Məlumatlar dəyişdikdə, İstifadəçi dərhal Şirkətə bu barədə məlumat verməlidir.

9. TEXNİKİ PROBLEMLƏR VƏ SİSTEM XƏTALARI

9.1 Platformada texniki nasazlıq və ya sistem çöküşləri səbəbilə sifarişin qeydə alınmaması, ləğvi və ya gecikməsi hallarında AviaBazaar MMC məsuliyyət daşımır. Belə hallarda istifadəçilərə yalnız imkan daxilində alternativ təkliflər təqdim edilə bilər.

9.2 AviaBazaar MMC sistemdə həyata keçirilən istənilən texniki dəyişiklik və yenilənmələr haqqında istifadəçiləri əvvəlcədən xəbərdar etmək üçün maksimum səy göstərir.

10. ÖDƏNİŞ SİSTEMLƏRİ VƏ TƏRƏFDAŞ PLATFORMALAR

10.1 AviaBazaar.az platformasında edilən bütün ödənişlər tərəfdaş ödəniş sistemləri (banklar və ya ödəniş provayderləri) vasitəsilə həyata keçirilir. AviaBazaar MMC bu platformaların texniki fəaliyyətinə və ya gecikmələrə görə məsuliyyət daşımır.

10.2 İstifadəçi tərəfindən edilən ödəniş təsdiqləndikdən sonra sifariş sistemdə qeydə alınır və təsdiq e-poçtu ilə göndərilir.

11. AVTOMATİK HESAB YARATMA VƏ İSTİFADƏÇİ GİRİŞİ

11.1 Qeydiyyatsız alış zamanı istifadəçi tərəfindən təqdim olunan məlumatlara əsasən sistem avtomatik olaraq şəxsi hesab yaradır. Bu hesaba daxil olmaq üçün istifadəçi qeyd etdiyi e-poçt vasitəsilə parol bərpası edə bilər.

11.2 Avtomatik yaradılmış hesablara sonradan giriş imkanı təmin edilir və istifadəçi məlumatları üzərində dəyişiklik edə bilər.

12. SƏNƏD VƏ MƏLUMATLARIN DƏQİQLİYİ

12.1 İstifadəçi təqdim etdiyi şəxsi məlumatların (o cümlədən pasport nömrəsi, doğum tarixi, e-poçt və əlaqə vasitələri) düzgünlüyünə görə məsuliyyət daşıyır.

12.2 Yanlış məlumat nəticəsində yaranmış hər hansı ləğv və ya əlavə xərc üçün AviaBazaar MMC məsuliyyət daşımır.

13. BİLET VƏ SƏNƏDLƏRİN GÖNDƏRİLMƏSİ

13.1 İstifadəçi tərəfindən həyata keçirilən sifarişə dair elektron bilet və təsdiq sənədləri yalnız təqdim edilən e-poçt ünvanına göndərilir.

13.2 E-poçt ünvanı yanlış və ya keçərsiz olduqda sifariş təsdiqi alınmaya bilər və bu, istifadəçinin məsuliyyətindədir.

13.3 Rəylər və İctimai Məzmun

13.4 Platformada təqdim edilən rəy bölməsində istifadəçilərin paylaşdıqları məzmunlar əvvəlcədən yoxlanılmadan yayımlanır. Lakin AviaBazaar MMC qeyri-etik, təhqiramiz və ya yalan məlumatlar paylaşan istifadəçilərin rəylərini silmək və hesabını deaktiv etmək hüququna malikdir.

14. PROMO KODLAR VƏ ENDİRİMLƏR

14.1 Promo kodlar yalnız platforma tərəfindən elan edilən tarixlər və şərtlər çərçivəsində keçərlidir. Endirimlər digər təkliflərlə birləşdirilə bilməz, əks halda bu, sistem tərəfindən ləğv edilə bilər.

15. ELEKTRON VASİTƏLƏRLƏ YAZIŞMALAR VƏ MÜQAVİLƏLƏR

15.1 İstifadəçinin elektron vasitələrlə verdiyi və ya vermək niyyətində olduğu Şirkətin aldığı hər hansı yazışma və ya müqavilə, onun faktiki olaraq İstifadəçidən göndərilib-göndərilməməsindən asılı olmayaraq, müvafiq qaydada İstifadəçi tərəfindən səlahiyyətləndirilmiş və onun məsuliyyətində olan hesab olunur və İstifadəçi üçün məcburidir.

15.2 İstifadəçi razılaşır ki, elektron vasitələrlə çatdırılan, alınan və ya bağlanılan istənilən yazışma vəya müqavilə imzalanmış və/və ya çatdırılmış və mövcud qanunvericiliyə uyğun olaraq “yazılı sövdələşmə” hesab olunur. İstifadəçi həmçinin razılaşır ki, yazışma və ya müqavilə elektron vasitələrlə çatdırıldığına, alındığına və ya bağlandığına görə və eləcə də “yazılı” və ya imzalanmış olmadığına və ya əlbəəl çatdırılmadığına görə heç bir belə yazışma və ya müqavilə ilə bağlı mübahisə etməyəcək.

15.3 Bu Təlimatın məqsədləri üçün, “elektron vasitələr” termini kompyuter, telefon, mobil telefon, smartfon, İnternet, elektron poçt, rəqəmli assistent (PDA), faks və ya istənilən digər telekommunikasiya və ya elektron ötürmə metodu daxil olmaqla, Şirkətin vaxtaşırı icazə verə bildiyi istənilən kommunikasiya metodu deməkdir.

16. TƏHLÜKƏSİZLİK

16.1 İstifadəçi özünün Şifrəsini hər zaman tam məxfi saxlamalıdır. İstifadəçi heç kəsə öz Şifrəsini açıqlamalıdır. Əgər İstifadəçi öz Şifrəsinin kiməsə məlum olmasından şübhələnərsə və ya bu barədə xəbər tutarsa, İstifadəçi dərhal Şirkətə bu barədə məlumat verməlidir və dərhal Şifrəsini müvafiq qaydada dəyişməlidir. İstifadəçinin bu bənd üzrə öhdəlikləri aşağıda göstərilən istisnalardan asılıdır:

16.2 İstifadəçi Şifrəsi özünəməxsus və digər şəxslər tərəfindən asanlıqla tapıla bilməyən və ya əldə oluna bilməyən olmalıdır, o cümlədən: doğum tarixindən və ya İstifadəçinin öz və ya ailə üzvünün adından, İstifadəçinin telefon nömrəsindən və ya “1234” kimi ardıcıl rəqəmlərdən istifadə etməməlidir. Güclü şifrə ən azı 8 (səkkiz) işarədən ibarət olmalı, hərflərdən rəqəmlərdən və ya simvollardan istifadə etməlidir.

16.3 Xidmətlər üçün İstifadəçiyə məxsus məlumatların təhlükəsizliyi İstifadəçinin normal təhlükəsiz iş qaydalarına riayət olunmasından asılıdır. İstifadəçi razılaşır ki, Xidmətlər vasitəsilə əməliyyatlar həyata keçirərkən, İstifadəçi əməliyyat həyata keçirmək məqsədilə Xidmətlər vasitəsilə ötürülən məlumatlar daxil olmamaq şərtilə, hər hansı məxfi məlumatın kimsəyə açıqlanmamasının təmin olunması üçün bütün lazımı tədbirləri görür. Buraya o cümlədən aşağıdakılar daxildir: digər insanlar İstifadəçinin kompyuter ekranını və ya Elektron Daxilolma Cihazındakı klaviaturanı görməməlidir və İstifadəçinin zəngini eşitməməlidir.

16.4 İstifadəçi mövcud e-mail ünvanı və əlaqə nömrəsini dəyişmək istəyərsə, e-mail ünvanı və ya əlaqə nömrəsi məlumatlarından biri təsdiqli olmalı, və yalnız əlaqə vasitələrindən biri təsdiqli olduqdan sonra, “Tənzimləmələr” bölməsində "Redaktə et" düyməsi vasitəsilə e-mail ünvanı və ya əlaqə nömrəsini dəyişə bilər.

16.5 İstifadəçi AVİABAZAARDA-da mövcud olan e-mail ünvanı və ya əlaqə nömrəsini "Tənzimləmələr" bölməsinə daxil olaraq, “Təsdiqlə” düyməsi vasitəsilə təsdiqləyə bilər.

17. İSTİFADƏÇİNİN ONLAYN ƏMƏLİYYATLAR ÜZRƏ MƏLUMATLARININ TOPLANMASINA VƏ İSTİFADƏSİNƏ RAZILIQ

17.1 Şirkət “cookie” fayllarından və digər izlənmə texnologiyalarından istifadə etməklə İstifadəçinin onlayn əməliyyatlar və ya üçüncü tərəflərin internet saytlarında yerləşdirilən Şirkətin elanları üzrə məlumatları toplaya bilər və internet saytlarının təhlükəsizliyini təmin edə bilər.

17.2 İstifadəçinin onlayn əməliyyatları üzrə məlumat və Şirkətin İstifadəçi barədə malik olduğu digər məlumatlarla birgə Şirkətin onlayn reklam kampaniyalarının effektivliyini qiymətləndirmək, internet saytının funksionallığını barədə məlumat toplamaq, İstifadəçinin maraq və ehtiyaclarını anlamaq, İstifadəçini xüsusi onlayn təcrübə ilə təmin etmək və İstifadəçini maraqlandıra biləcək məhsullar və xidmətlər barədə İstifadəçini məlumatlandırmaq üçün istifadə oluna bilər.

17.3 Şirkət İstifadəçinin şəxsi məlumatını Azərbaycan Respublikasının şəxsi məlumatın qorunmasını təmin edən qanunlarına uyğun olaraq qəbul etməlidir, saxlamalıdır, istifadə etməlidir və pozmamalıdır.

18. KAMPANİYALAR VƏ ONA DAİR MƏHDUDİYYƏTLƏR

18.1 AviaBazaar MMC zaman-zaman platforma istifadəçiləri üçün stimullaşdırıcı kampaniyalar, lotereyalar və ya mükafatlı oyunlar keçirmək hüququna malikdir. Belə kampaniyalar yalnız reklam və tanıtım məqsədilə təşkil olunur və iştirak üçün heç bir ödəniş və ya alış tələb olunmur.

18.2 Kampaniyalar zamanı toplanan şəxsi məlumatlar yalnız kampaniyanın keçirilməsi və qalibin müəyyən edilməsi məqsədi ilə istifadə olunur və üçüncü şəxslərə ötürülmür (istisna hallarda qanunvericiliklə tələb olunan hallar istisna olmaqla).

18.3 Qalibin müəyyənləşdirilməsi zamanı təsadüfi seçim üsulu və ya AviaBazaar MMC tərəfindən müəyyən olunmuş digər şəffaf mexanizmlər tətbiq edilə bilər. Qalibin elan olunması şirkətin rəsmi kanalları vasitəsilə həyata keçiriləcəkdir.

18.4 Kampaniyada iştirak hüququ yalnız bir nəfər üçün bir dəfə nəzərdə tutulur. Eyni şəxsin bir neçə dəfə iştirak etməsi halları aşkarlanarsa, şirkət həmin iştirakçını kampaniyadan uzaqlaşdırmaq hüququna malikdir.

18.5 Qalibin təyin olunmuş hədiyyəni, o cümlədən aviabileti və ya digər səyahət imkanını istifadə edə bilməməsi və ya imtina etməsi halında, AviaBazaar MMC hər hansı alternativ kompensasiya təqdim etməyə borclu deyil.

18.6 Qalibə təqdim olunan mükafat mövcud hava yollarının uçuş qrafikinə və yer mövcudluğuna əsasən müəyyən edilir. AviaBazaar MMC tərəfdaş hava yolları tərəfindən edilə biləcək uçuş dəyişikliklərinə və ya ləğvlərinə görə məsuliyyət daşımır.

18.7 Kampaniyada iştirak etməklə istifadəçi bu bəndin bütün şərtlərini qəbul etmiş sayılır.

19. ƏQLİ MÜLKİYYƏT

19.1 Başqa cür göstərilməmişsə, Xidmətlərə aid bütün mətnlər, şəkillər, illüstrasiyalar, proqram təminatı, HTMLkodları, audio kliplər və video təsvirlər daxil olmaqla bütün əmtəə nişanları, loqolar və bütün işlər Şirkətin mülkiyyətidir, və şəxsi və qeyri-kommersiya məqsədləri üçün istifadə olunan hallar istisna olmaqla baxılma, çap edilmə və ya elektron surətlərinin arxivləşdirilməsi da daxil olmaqla, onlar bu Təlimata və Şirkətin sonradan İstifadəçiyə verə biləcəyi göstərişlərə uyğun olaraq Şirkətin yazılı icazəsi olmadan heç bir halda nə bütövlüklə, nə də qismən yenidən düzəldilməməlidir, yüklənməməlidir, yerləşdirilməməlidir, ötürülməməlidir, paylaşdırmamalıdır və ya dəyişdirilməməlidir.

20. TƏTBİQ OLUNAN QANUNVERİCİLİK

20.1 Bu İstifadə Şərtlərində xüsusi olaraq qeyd olunmayan bütün məsələlər yalnız Azərbaycan Respublikasının qanunvericiliyinə uyğun şəkildə tənzimlənir. Xidmətlərə daxil olma və ya onlardan istifadə etmə və ya bu İstifadə Şərtləri ilə bağlı hər hansı mübahisələr yarandıqda, tərəflər belə mübahisələri danışıqlar yolu ilə həll olunması üçün əlindən gələni etməlidir.

20.2 Danışıqlar başlayan andan etibarən tərəflər mübahisələri 30 (otuz) gün ərzində həll etməzsə, istənilən tərəf belə mübahisələrlə bağlı müstəsna yurisdiksiyaya malik olan Azərbaycan Respublikasının məhkəmələrinə müraciət edə bilər.