Eyni reysdə yan-yana oturan iki sərnişin bilet üçün tamam fərqli pul ödəmiş ola bilər. Səbəb sadədir: aviabilet qiyməti mövsümə, tələbə, həftənin gününə və bileti nə vaxt aldığınıza görə dəyişir. Bu qaydaları bilmək eyni səfərə xeyli az pul xərcləməyə imkan verir. Aşağıda işə yarayan 12 üsulu topladıq.
1. Bileti erkən götürün
Xarici uçuşlarda bileti təxminən 2–4 ay əvvəl almaq çox vaxt daha sərfəli olur. Yay, Yeni il və bayram günləri üçün isə bundan da tez baxmağa başlayın. Dubay, İstanbul, Antalya, Paris, Roma kimi populyar istiqamətlərdə ucuz yerlər birinci satılır və tələb artdıqca qiymət sürətlə qalxır.
2. Tarixlərdə bir az çevik olun
Səfər tarixiniz dəqiq deyilsə, bir neçə gün əvvəlki və sonrakı reyslərə də baxın. Bəzən cəmi bir gün fərq qiyməti nəzərəçarpacaq dərəcədə aşağı salır. Həftə ortasındakı uçuşlar da çox vaxt həftəsonundakılardan ucuz olur.
3. Səhər tezdən və gecə uçan reyslərə baxın
Erkən səhər və gecə saatlarındakı reyslər az adamın xoşuna gəlir, ona görə də qiymətləri çox vaxt gündüz reyslərindən aşağı olur. Bir yuxusuz gecəyə dözə bilirsinizsə, bu, yaxşı qənaətdir.
4. Mövsümü düzgün seçin
Qiymətlər ən çox iyul–avqustda, Yeni ildə, Novruzda və Milad bayramında qalxır. Ən sərfəli aylar isə adətən fevral, mart, oktyabr və noyabrdır. Bu aylarda həm biletlər, həm otellər ucuz olur, gəzməli yerlərdə izdiham da az olur.
5. Baqaja əvvəlcədən qərar verin
Yalnız əl yükü ilə gedirsinizsə, aşağıbüdcəli aviaşirkətlərin tarifləri çox sərfəli ola bilər. Amma baqaj lazımdırsa, onu bilet alarkən əlavə edin: hava limanında almaq xeyli baha başa gəlir. Ətraflı: əl yükü və baqaj qaydaları.
6. Alternativ hava limanlarını yoxlayın
London, Paris, Milan və İstanbul kimi şəhərlərin bir neçə hava limanı var. Bəzən digər hava limanına uçan bilet xeyli ucuz olur. Sadəcə hava limanından şəhərə yolun nə qədər vaxt və pul aparacağını da hesablayın.
7. Gediş-dönüşü ayrı-ayrı da yoxlayın
Bəzən gediş və dönüşü bir biletlə almaq ucuz çıxır, bəzən də fərqli aviaşirkətlərdən iki ayrı bilet. Hər iki variantı müqayisə etməyə bir neçə dəqiqə ayırın.
8. Transferli reysləri də nəzərə alın
Birbaşa reys rahatdır, amma həmişə ən ucuz deyil. Bir transferli reys bəzən xeyli sərfəli olur, xüsusən uzaq istiqamətlərdə. Transfer üçün nə qədər vaxt qoymaq və nələrə diqqət etmək lazım olduğunu transferli uçuşlar yazımızda izah etmişik.
9. Kampaniyaları izləyin
Aviaşirkətlər il ərzində tez-tez endirim edir. Ən böyük endirimlər adətən Black Friday, Cyber Monday və mövsüm dəyişən vaxtlarda olur. Sevdiyiniz aviaşirkətlərin xəbər bülleteninə yazılsanız, belə təklifləri ilk siz görərsiniz.
10. Uçuşu və oteli birlikdə müqayisə edin
Bəzi hallarda uçuş və otel birlikdə, yəni tur paketi kimi, ayrı-ayrılıqda almaqdan ucuz başa gəlir. Xüsusən Antalya, Dubay kimi kurort istiqamətlərində bu varianta da baxın.
11. Ucuz biletin şərtlərini oxuyun
Ən ucuz tariflər adətən geri qaytarılmır və tarixi dəyişmək üçün əlavə ödəniş tələb edir. Planlarınız dəyişə bilərsə, bir az baha, amma çevik tarif sonda daha ucuz çıxa bilər. Səyahət sığortası da reysin ləğvi, gecikməsi və ya baqaj itkisi zamanı xərclərin bir hissəsini qaytarmağa kömək edir.
12. Etibarlı platformadan alın
Bilet alarkən bunlara baxın: ödəniş təhlükəsizdir, qiymət şəffafdır, sonradan gizli komissiya çıxmır, problem olanda müraciət edə biləcəyiniz dəstək xidməti var. Uçuşu, oteli və turu bir yerdə müqayisə etmək imkanı da vaxt qazandırır. Tarix və qiymətə görə reysləri AviaBazaar-da müqayisə edə bilərsiniz.
